دكتورة نسا تهاجم طبيب الغلابة: بلاش تهللوا زي البهاليل ليس نظيفا وكان يكسب 2000 جنيه في اليوم

لم تمر أيام علي وفاة الدكتور محمد مشالي الملقب بـ طبيب الغلابة ، والحزن الذي خيم علي صفحات المواقع التواصل الاجتماعي والذي لمسناه في كل دول العالم العربي ، حتي خرجت إحدى الطبيبات لتهاجم طبيب الغلابة.

الدكتورة حنان السكري أستاذ أمراض النساء والتوليد كتبت عبر صفحتها بموقع التواصل الاجتماعي "الفيس بوك" قائلة :" بعد وفاته من أيام رجع الإعلام يمجد فيه سواء قنوات فضائية أو مواقع صحفية على النت ده غير بيان رئاسة الوزراء و الوزارة و غيره و غيره ..الله يرحمه و يغفر له .. لكن أرجع و أقول إن ممارسته للطب كانت خاطئة و فعل الخير له شروط و ممارسة الطب ليها شروط " حسب تعبيرها .

بداية القصة.. اضغط على الصورة

وتابعت "السكري " قائلة :" ممكن يعمل عيادة للأغنياء يدفعوا فيها و يعمل كشوف للفقراء ببلاش .. بس تكون عيادة نظيفة و مجهزة و عنده إمكانيات تشخيص صح ..و إلا هتلاقوني بكرة الصبح لابسة جلابية مبقعة و مقطعة و مأجرة مكان في منطقة شعبية في بدروم تحت السلم و جايبة شوية ألات مصدية و من غير جهاز تعقيم و ميكروسكوب اسود و لا سونار و لا سماعة جنين و كله بالبركة و مكتب خشب مسوس ، و أكشف على بناتكم و ستاتكم بنفس الآلات بعد ما احطها في شوية مطهر و خلاص و لا أشطفها بشوية مية و أشتغل نسا و أطفال و باطنة و تحاليل و جلدية و أنف و أذن و رمد و كله على كله ، بكشف ب 10 جنية و الناس هتبقى طوابير على العيادة و يجي لي في اليوم 200 كشف كل كشف ياخد مني 10 دقايق في السريع في 10 جنية يبقى 2000 جنية في اليوم يا اذكيا " حسب تعبيرها مثلما اضافت تعبيرات ضحك .

وبحسب الطبيبة ، :"الحق حق .. و ربنا هو اللي سوف يحاسب كل واحد .. لكن حبيت أقول لكم بلاش نفاق و تهليل زي البهاليل ..الرسول صلى الله عليه وسلم قال إن الله يحب إذا عمل أحدكم عملاً أن يتقنه ..و النظافة من الإيمان ..و الله يرحمه و يغفر له تاني .." حسب تعبيرها .

هنا ثار متابعيها عبر صفحة الفيس بوك" فكتبت الكاتبة صابرين محمد :" طب بما انك حقانية ومهنية ومش حقودة ولا غلاوية خالص وكلامك هدفه خير ماتنزليلنا بقي ريفيوهاتك الحلوة الجميلة دي عن كام مستشفى حكومي وقولي بعلو صوتك ازاي المستشفيات دي واخدة ترخيص وهي بالمستوي ده ازاي السرائر بالمنظر ده والارض بالمنظر ده ولا الادوات حدث ولا حرج ولا القطط بتجري بين السرائر كأنهم مرافقين.. لا حول ولا قوة الا بالله اتقي الله ده الدنيا مش مضمونة ع الأقل " علي حد قولها.

وكتبت سارة علي قائلة :" احب اقول لحضرتك ان معظم كلامك صح بغض النظر عن الحديث عن مظهر الدكتور مشالى لان ده حاجه تخصه هوانا قولت الكلام ده قبل كده لما روحت اكشف على ابنتي كانت اول مره اروح ولما شوفت طريقه الكشف والادوات اللى يستخدمها " ، وعلق عاطف هلال :" حبيتي تأخذي شويه شهرة و شو إعلامي ف قولتي انتقد الراجل اللي الشعب المصري بل والعربي اجمعو علي حب الراجل دا بطلو حقد وغل بقي" حسب تعبيره .

وعلق محمد ناصر :" قمة الجهل ان الاسفاف يبقي من ناس المفروض انهم ذوات مستوي راقي و قمة الفشل ان تكتسب شهره علي حساب تشويه رجل بين يد الله فعلا خالف تُعرف حسبي الله و نعم الوكيل فيكو يا تجار البشر" ، وكتب اسلام خضير :" د مشالى كل الخير اللي عمله علشان ربنا إنما إنتى اللي تعمليه دلوقتي من هجوم على شخص ميت علشان الشهرة الأعمال بالنيات ولكل إمريء ما نوىله من الله ما يستحق ولكى من الله ما تستحقين".

وعاودت الظهور بعد مئات الرسائل التي هاجمتها لتكتب :" علشان وقتي لا يسمح بالرد على كل تعليق.. أرد هنا للجميع ..دي وجهة نظري العلمية و المهنية و لي مطلق الحرية في طرحها ..و رأيكم على راسي و لكم مطلق الحرية في إبداءه ..و الفقراء و الغلابة مسؤولية الدولة .. و ليسوا مسؤولية أطباء ..و الطبيب الغالي لا يفرض على أحد الذهاب إليه ..و ترخيص العيادات سواء من 50 سنة او دلوقتي له معايير و حد أدنى من الاشتراطات من يخالفها لا يتم السماح له بفتح العيادة و ممارسة العمل بها .. و للأسف عيادته كده و الكلام ده قلته و هو عايش .. و موش فاهمة إزاي النقابة و الوزارة يسمحوا بمكان زي ده " .

وتابعت :" كلامي ليس فيه تهكم و ازدراء لكن انا باقول طالما شايفين إن ده مثال و قدوة خلاص أعملكم زيه و افرحوا بيا و تعالوا أكشفوا عندي ..و طالما هو مقتدر مالياً ليه يفضل في المستوى ده ..و الطبيب لا يستغل مريض .. الطبيب في عيادته و المريض اللي يروح له بنفسه ..عاوزين خدمة طبية مجانية يبقى ده مسؤلية الحكومة ..و اللي يعارض الحق و يهاجم الصح هو حر .. لكن المفاهيم و القيم الصحيحة لا تتغير برفض البعض لها ..و اللغة ليست سخرية كما يظن البعض .. لكنها توضيح للواقع إللي عجبكم و لما كتبته بطريقة شديدة شوية زعلتم من كلامي و رفضتموه .. لكن قابلين الممارسة الغلط عادي " علي حد قولها .

وتساءلت :"كام واحد فيكم لو تعب و جاله مغص شديد مثلاً هيسافر طنطا مخصوص علشان يتعالج عنده ؟ ، لكن هتسافروا أسوان علشان تتعالجوا عند سير مجدي يعقوب .. و بالمجان خالص .. موش بعشرة جنية حتى ..اتحداكم تقبلوا تكشفوا في عيادة زي دي و تطمنوا للعلاج بدون تعقيم و فحوصات في معامل محترمة واخدة الجودة ..بلاش ازدواجية ..الغلابة حقها تتعالج صح و اللي عاوز يخدم يتبرع لهم طالما الحكومة مطنشاهم و إنتوا بتساعدوها" حسب تعبيرها .