زوجة تطلب الخلع: بقاله سنة بيخرج بنفس الطقم للشغل

”كنت بلاحظ في فترة الخطوبة إنه مش بيحب يزورني كتير، لكن كنت بقول أكيد مشاغل الدنيا ومش فاضي، وكمان بيجهز في شقته لإن خطوبتنا مطولتش ومفكرتش أنه بخيل أبدا، لحد ما اتجوزت ولقيته إنسان بخيل جدا وكل حاجة بيحسبها بالورق والقلم، لدرجة أنه بيحرمه على نفسه من متاع الحياة واللبس عشان يحوش فلوس، وكمان بخيل معايا جدا في طلبات البيت وأنا مش متعودة على كدا طول عمري متربية في بيت فيه كل حاجة وبيت كرم مش بخل زيه ولما أطلب حاجة يقولي انتي إنسانة مسرفة”.. جاءت هذه الكلمات على لسان مها، وهي داخل محكمة الأسرة لرفع دعوى خلع من زوجها بعد عام من الزواج مبررة استحالة العشرة معه.

وقالت الزوجة، أنا من أول ما اتجوزت وأنا عايشة مع واحد في قمة البخل اللي في الدنيا، بخيل حتى على نفسه في الأكل والشرب واللبس، ومش بيحرج من كدا حتى لدرجة أنه بقاله سنة بيروح الشغل بنفس الطقم ومش هاين عليه يشتري طقم جديد، على الرغم إنه حالته المادية كويسة ومعاه فلوس، طلبات البيت بيجبها بالعافية وكمان هما فرختين وكليو لحمة في الشهر والباقي نأكل أي حاجة، مكنش بيديني فلوس اصرف منها هو اللي كان يشتري الحاجات لدرجة إن والدتي لما حست كانت بتبعت ليا فلوس اشتري بيها احتياجات شخصية.

وتابعت حديثها قائلة: وطبعا مكنتش مرتاحة وخاصة إن كنت عايشة حياة كويسة جدا وفي مستوى مادي عالي عند والدي، لكن حسيت إنه عايز أهلي يصرفوا عليه، لأنه لما عرف إن والدتي بتديني فلوس معترضش، وكان مبسوط لكن أنا كنت ببص لبكرة لما أخلف طفل ازاي أعيشه مع أب بخيل بالشكل دا، عشان كدا قررت انفصل عنه قبل ما ربنا يكرمني منه بطفل ورفعت دعوى خلع لما رفض يطلقني ومازالت الدعوى منظورة أمام القضاء.