ناهد السباعي: أتمنى فيلمي 19 ب يحصد جائزة في مهرجان القاهرة.. ووالدتي أكبر داعم في حياتي

تحدثت الفنانة ناهد السباعي، عن فيلمها 19 ب، المشارك في مسابقة مهرجان القاهرة السينمائي الدولي بدورته الـ 44، متمنية أن يحصد الفيلم جائزة المهرجان.

 

وقالت ناهد السباعي، خلال حوارها مع قناة DMC، على هامش فعاليات حفل افتتاح مهرجان القاهرة السينمائي: 19 ب أنا أولًا كان نفسي اشتغل مع أحمد عبد الله من زمان، والتجربة كانت حلوة جدًا، والفيلم كان صعب لأن تصوير الحيوانات كانت صعب لأنها حيوانات ضالة مش مدربة، واللوكيشين فيه حيوانات كتير جدًا والأبطال قليلين، وأنا بحب الفيلم جدًا وأتمنى إنه ياخد جائزة في المهرجان.

 

وهنأت ناهد السباعي، المخرجة كاملة أبو ذكري، على تكريمها بجائزة فاتن حمامة للتميز، قائلة: كاملة طلعت مني كل حاجة مختلفة، عمري ما تخيلت إني ممكن أعمل الأدوار لولا الأستاذة كاملة، دوري في مسلسل ذات كان صعب أوي لأن كان تاني حاجة أعملها في حياتي، وعملنا الفيلم القصير 18 يوما بردو كان فيلما صعبا جدًا.

 

وتابعت: عملنا فيلم يوم للستات وده أهم نقلة ليا ودور زي ده مبيجيش في حياة الممثلين ليه، وأنا مش مستغربة إن كاملة أبو ذكري خدت جائزة التميز، والممثلين معاها بيبقوا مختلفين وأعمالها مميزة وبتعيش جدًا.

ناهد السباعي

 

كما تحدثت ناهد السباعي، عن دور والدتها في حياتها ودعمها في مشوارها الفني، قائلة: مامتي مثقفة جدًا ودايمًا بتخليني أتعلم وأناقش معاها الأفلام بطريقة معينة وبتخليني أفكر، ومن أول ما بدأت وهي بتعرفي أروح ورش فين وأعمل إيه، هي دعمها كبير أوي ليا وكفاية عليا إن ناهد فريد شوقي تبقى أمي.