(العويل)

علي فين العزم يا بت أنتي

بت أما تبتك ياسي حمدي

وبرغم الرد المتعاجل

ولكنك  بنت بميت راجل

كان غرضي سؤال عن أحوالك

إسأل ياسي حمدي اللي ف بالك

 *

شفتيش يا هنيه الواد عتمان

والنبى يا سى حمدى بقالى زمان

رجليا ما خطت للشارع

ولا بعرف ماضى ولا مضارع

إمال راح فين بن الصرمه

دا أديله يومين فايت الحرمه

غايب عن ولده بقاله يومين

ولا قالش الفلتان رايح فين

يمكن يا سى حمدى راح يرزق

ما بلاش يا هنيه أصلي هطرشق

من إمتى الواد عتمان مِذّوق

ناقص تقوليلى دا بيدبق

دا بن المركوب عمره ما فكر

يضحك لمراته ولو منظر

والست عشان ست عظيمه

حاطه فى بقها جزمه قديمه

ساكته وبتخاف قوى من رده

لكن الموضوع زاد عن حده

دا بيطفش فجأه ويتسرمح

ويروح ولا نعرفلوش مطرح

وإذا وفر قرش بقطاره

بيروح يصرفه ف( الخم.... ) الخراره

وتشوفه تقول الواد عنتر

أتاريه بلونه ومش اكتر

بالذمه دا إنسان يا هنيه

إزاى محسوب ع البشريه

في الأخر شفته المحروس

فاتح مشروع الموكوس

من كتر نطاعته ورطوبته 

الناس في بلدنا  رمت طوبته