مش محتاجة شهرة.. أول تعليق لـ ريهام سعيد بعد قرار عودة برنامجها

وجهت الإعلامية ريهام سعيد رسالة للجمهور، تزامنًا مع قرار المجلس الأعلى للإعلام، بعودة برنامجها “صبايا الخير”، بعدما كان أعلن عن إيقافه، بعد حلقة “صيد الثعالب”.

وكتبت ريهام سعيد عبر حسابها الشخصي بموقع التواصل الاجتماعي “فيس بوك”، وقالت: “على قد ما زعلت إني اتهاجمت واتجرحت كتير، فرحت أوي إن ناس كتير بقت رحيمة بالحيوانات، حتى لو مفترسة وخطر على البني آدم، أنا بعتذر على أي مشهد في إساءة لأي حد، وخصوصًا الناس المهتمة بالرفق بالحيوان”.

وتابعت: “بعتذر إني تسببت في أي ألم لأي حد فيكو، لكن لازم تكونوا متأكدين إن اشتغلت وتعبت واجتهدت 18 سنة، وأكيد مش محتاجة أي شهرة، ومشاهدة الهدف الوحيد هو تقديم محتوى محترم صادق ومفيد، كنت عايزة أسلط الضوء على مهنة الصيد اللي موجودة في كل أنحاء العالم، بمميزاتها وعيوبها”.

وأضافت: “حبيت أقدم الحقيقة وأزود معلومة جديدة لإن هي دي نيتي، بس أنا مش بشتغل في مهنة الصيد ولا بمارسها، لكن هي موجودة، أي اتهامات أنا هرد عليها الحلقة الجاية، لكن المهم دلوقتي محدش يزعل مني، لان أكيد كل اللي اتقال دا مش حقيقة، أنا عايزة أعيش في سلام وكفاية مشاكل”.

وأردفت: “نفسي اللي بيهاجمو أو عمرهم ما اتفرجوا عالبرنامج يبتدو يتابعو يمكن تشوفو اد ايه بنتعب واد ايه حريصين إن إحنا نقدم أحسن حاجة، أنا اسفة مرة تانية والمرة اللي جاية هحط في الإعتبار إن ساعات الحقيقة ممكن تجرح بس، طلب آخير، لما تلاقو غلط انصحو وصلحو ومتجرحوش، لإن أكيد اللي رحيم بالحيوان، هيكون أكيد رحيم بالبني آدم، اللي هو إنسان اللي هو ربنا حاطة في أعلى مرتبة، أنا إنسانة وأكيد الحكم عليا أنا وعيلتي بالإعدام مش عدل، خصوصًا إن طول الوقت في سوء تفاهم، ولكن بيكبر نتيجة المشاهدة العالية، بتعرض لهجوم وإساءة رهيبة من غير ماحد حتى يعمل اعتبار لأولادي أو أمي، من دلوقتي لازم نفهم اد ايه إحنا بنتشاف ولازم نكون أد المسؤلية، وحتى لو لينا أعداء متربصين، أمشي عدل يحتار عدوك فيك، وعد مش هنغلط تاني سامحوني”.