مستفز.. ريم تطلب الخلع: الحوار بينا بقى كله شتيمة

”عمرى ما كنت أتخيل الأمور توصل لدرجة انى أشتم جوزى فى يوم من الأيام لكن هو وصلنى لكدا، بطريقته المتخلفة والمستفزة فى الحوار، وأنه هو اللى بدأ بالشتيمة الأول ووصلنى انى أرد عليه وبقي أسلوب تعامل بينا، وللأسف هو إنسان عديم المشاعر وتقبل انى اشتمه”.. جاءت هذه الكلمات على لسان ريم وهى داخل محكمة الأسرة لرفع دعوى خلع من زوجها بعد عام ونصف من الزواج مبررة استحالة العشرة معه.

وروت الزوجة قصتها لقائلة: من أول ما اتجوزنا واكتشفت ان جوزى راجل سليط اللسان، ميعرفش يعنى إيه يقدر شعور مراته، أو يحترمها، كل كلمة يغلط فيا ويشتمنى، قدام أى حد، كنت فى البداية بعيط وبس لكن مع الوقت اتجرأت عليه وبقيت أرد الشتيمة، والغريبة انه عادى لحد ما بقينا طول الوقت نشتم بعض، أنا اتخنقت من الأسلوب دا ومحبتش ان حياتى تبقي كدا ولا أنى أخلف طفل يشوفنى أنا وأبوه كدا، وطلبت منه نتكلم ونوصل لحل كويس اننا نحترم بعض.

وتابعت حديثها قائلة: كان عندى أمل يوافق لكن لقيته بيتريق عليا، واستمر زى ما هو كدا وكرهت العيشة معاه لدرجة انى كنت بدعى ربنا مخلفش منه، وطلبت الطلاق لكن رفض وبدأ يهددنى، عشان كدا رفعت دعوى خلع بمحكمة الأسرة وأنتظر أولى الجلسات.