عملنا محاضرة.. شريف إكرامي يحكي موقفا طريفا مع والده بسبب خناقة

علق شريف إكرامي حارس مرمى نادي بيراميدز، على تفضيل رمضان صبحي اللعب في صفوف نادي بيراميدز بدلا من الأهلي، وهو ما عرضه لانتقادات واسعة من جماهير الشياطين الحمر، قائلا: «ده قراره».

كما كشف إكرامي، في حواره مع الإعلامية بسمة وهبة مقدمة برنامج «العرافة»، الذي يعرض عبر شاشة «المحور»، عن حادث على كوبري 6 أكتوبر، عندما كان صغيرا في السن، موضحًا أنه كان رفقة شقيقه الراحل، وكان يبلغ من العمر 17 سنة، بينما شقيقه يبلغ 20 عاما: «كنا في فريق واحد بالنادي الأهلي، وفي شهر رمضان كنا راجعين على كوبري أكتوبر، كنت حاسس إني في ريعان الشباب ورجلي شايلاني، وافتريت، ولما كنا راجعين حد كسر علينا فكسرنا عليه، وحصل تراشق، وأخي كان عصبي، وحصلت خناقة كبيرة، والموضوع تطور إلى الضرب».

وأضاف: «مشينا ورحنا النادي تاني يوم، وفوجئنا إن في محضر اتعمل ضدنا في قسم مدينة نصر، أخدنا كلمتين في النادي، وبابا عرف وعمل لنا محاضرة، وإننا في شهر رمضان، وإحنا مش بلطجية، ومن اليوم ده أخدت على نفسي عهد إن ده آخر يوم هيحصل احتكاك بيني وبين أي حد في الشارع».

وتابع: «ولما بابا كان بيكلمنا، لقينا حد جاي من القسم ومعاه محضر، وبابا قال لنا وصلت لحد كده، وهي دي أخرة الزمن وأنا عمري ما عملت كده، وكنا في منتهى الكسوف، فلما قابلت اللي كان جاي بالمحضر، قال لنا إنه محتاج بابا، لأن في سواق نقل عمل فيه محضر لأنه ضربه امبارح، فالمحاضرة دي كلها قلبت بضحك غير طبيعي»