زوج بوسي يدافع عنها: ”رصيدها زاد عندي لما وافقت أرجع لأم أولادي”

للمرة الأولى علق مصفف الشعر هشام ربيع، زوج المطربة الشعبية بوسي، على شائعة انفصالهما والتي انتشرت خلال الأيام الماضية.

وقال خلال مداخلة هاتفية لبرنامج “90 دقيقة”، مع الإعلامية بسمة وهبة، والمذاع عبر فضائية “المحور”: "الموضوع مأفور بشكل غير عادي في السوشيال ميديا وبوسي تنهار بسبب حديث السوشيال ميديا واتهامها أنها كانت تعوق والدها".

وأضاف هشام ربيع: "المشكلة إن بوسي مطربة مشهورة وده بيخلي الناس تتابع أخبارها، ومش عارف ليه الناس شاغلة نفسها بينا ليه، المشكلة إن بوسي مش بتطلع ولا بتواجه، وهي شايفة ده ميزة، رغم إنها بتنهار".

وتابع “ربيع”: "أم أولادي منذ 15 عاما لها قدر كبير من الحب والاحترام في قلبي، اللي بيضايقني إن الناس اللي قاعدة على مكاتبها ومش بتتحرى الأخبار بيقولوا كلام ملهوش أساس من الصحة".

وأردف: "رجعت لأم أولادي وولادنا مع بعض في كل حتة، ورصيد بوسي زاد عندي لما وافقت إن أرجع لأم الأولاد".

أزمة بوسي مع والدها

وعن أزمة بوسي ووالدها قال هشام ربيع: "صالحتها ووالدها على بعض، وقلت لها عاوزين نتصور مع بعض وننزل الصورة عشان الناس فاهمة إنك عاقة، لكن هي قالت أنا ميهمنيش الناس، أنا بعامل ربنا".

وتابع: "حد بيقول إن ربنا غضبان عليها عشان خلافاتها مع والدها، لكن لو الشخص ده تابع هيلاقي إن بوسي كانت بتكلم والدها شبه يوميًا ومتصالحين قبل العيد الكبير، والدنيا ماشية بخير، لكن لما والدها توفى عرفت بعدها بيومين، في ناس في عائلتها لا يحبونها ولا يتمنون الخير لها".

وأكمل: "اتصلت بناس في العائلة وقالت إنها مستعدة لسداد ديون والدها إن وجدت، وبعتتت لوالدها حاجة كبيرة جدا في عيد الأضحى".