لميس الحديدي: ”الأسعار هتزيد ومنقدرش نطلب من المواطن ترشيد أكتر من كده”

قالت الإعلامية لميس الحديدي، إن الفترة القادمة ستشهد سياسة مرنة لسعر الصرف الفترة القادمة يتبعها تراجع لقيمة الجنيه أمام الدولار.

وأضافت "الحديدي"، خلال برنامجها "كلمة أخيرة" المذاع على قناة "أون": "هنشوف ارتفاعات أخرى من الواضح أنها ستكون تدريجية، أرجو بقى من التجار اللي هما مسعرين أصلاً من زمان على السعر الأعلى ألا يقدموا على رفع للأسعار بلاش تلاقي سعر الدولار رايح في اتجاه فتقوم رافع تاني لأنك بالفعل عملت ده من فترة مش عاوزين تضخم كبير لأنه مهما ارتفع هيوصل لسقف معين مش هيتخطاه زي 2016".

وتابعت "الحديدي": "الدور في الفترة القادمة على المواطن والدولة في ذات الوقت، والدولة قبل المواطن ولازم الدولة تحدد أولويات المشروعات ماينفعش تقول هعمل كل حاجة فإذا كنت إنت هتعمل كده بتطلب مني ليه كمواطن أرشد؟ هتكملوا المشروعات كلها منين في الوضع ده؟ ولازم كمواطن أحس أن الدولة بترشد معايا مش بس بتطفي النور".

واستطردت: “ترشيد الحكومة في أولويات المشروع ولازم المواطن يحس بده عشان يقدر يرشد وأنما مقدرش أطلب من المواطن ترشيد أكتر من كده”.