إلهام شاهين تشيد بمبادرة أخلاقنا الجميلة: السوشيال ميديا أظهرت الآراء السخيفة

أشادت الفنانة إلهام شاهين، بالمبادرة التي أطلقتها الشركة المتحدة للخدمات الإعلامية خلال الأيام الماضية، بعنوان أخلاقنا الجميلة، والتي تستهدف التأكيد على الأخلاق التي تربينا عليها، مؤكدة على أهميتها خلال الفترة الحالية لمنع العديد من الظواهر المنتشرة في المجتمع منها ظاهرة التنمر وعدم احترام الآخرين.

إلهام شاهين: محتاجين نرجع أخلاقنا الجميلة

وقالت إلهام شاهين، إن هذه المبادرة مهمة للغاية في الوقت الحالي بسبب الانتقادات والتنمر التي يتعرض لها الكثرين حاليا، معلقة: الموضوع مهم لأننا محتاجين نرجع أخلاقنا الجميلة، وأن محدش يتنمر على حد مش كل حد ينتقد وخلاص على أساس أن هو اللي فاهم اكتر من الآخرين.

وتابعت إلهام شاهين: المعاملة في الشارع والخناقات اللي بنشوفها، وأيضا احترام الولد حتى لما يكون صديق لبنت أو زميل ليها لابد أن يكون هناك احترام متبادل بينهما.

وأضافت إلهام شاهين، أن العنف أصبح حاليا ظاهرة منتشرة في مجتمعنا، وإذ نظرنا إلى المجتمع سابقا سوف نلاحظ أن جميع هذه الظواهر غير موجوده كان هناك احترام متبادل.

وواصلت إلهام شاهين: زمان الولد لما كان يلاقي ست لو في مواصلات يقوم لها عشان تقعد، كان في أدب واحترام للست احترام للأكبر سننا، وأيضًا التعاملات مع الأطفال كانت مختلفة.

واستكملت: من يوم ما طلعت السوشيال ميديا وظهر التطاول على الآخرين والتنمر ضدهم والآراء المتطرفة السخيفة، أن واحد يقول أنا ديني أحسن من الدين الآخر، طول عمرنا عايشين مع بعض وبنحترم بعض ومع بعض في مناسباتنا كلنا بنفرح فيها، مكنش في حاجة اسمها مناسبة لمسلم ومسيحي كلنا بنحتفل بكل الأيام العيد كان للجميع.

واردفت إلهام شاهين: أنا شايفة أنها مبادرة رائعة وياريت كلنا فعلا نتعلم ونرجع نشوف أهالينا وجدودنا كانوا بيتعاملوا إزاي، والمجتمع كان عامل إزاي والأخلاق كان شكلها إيه، حتى بيبان من أفلام الأبيض والأسود بنشوف مصر قد إيه كانت جميلة في كل حاجة في أخلاقها وشكل الناس وجمال شوارعها وفي النظافة، الكل بيحافظ على البلد عشان دي بلادنا كلنا مش عشان خايف حد يعاقبه.

واختتمت إلهام شاهين، حديثها قائلة: لازم نحترم المرور نحترم أن بلدنا تبقى نظيفة منوسخهاش، ونحترم بعض ونبطل تنمر على الآخر.