أحمد زاهر: التمثيل أصعب مهنة في التاريخ وكنت رافض تمثيل ليلى وملك

تحدث الفنان أحمد زاهر عن صعوبات مهنة التمثيل، مؤكدًا أنها أخطر مهنة ممكن أن يمتهنها شخص، كما تطرق لدخول نجلتيه (ليلى وملك) عالم التمثيل؛ مؤكدًا أنه كان رافضًا هذا الأمر.

وقال أحمد زاهر، خلال لقائه في برنامج "الحقيقة أولًا" من تقديم فاتن زين الدين عبر قناة "الحرة": "أحنا أخطر شغلانة ممكن تدمر أي بني آدم وفاكرين الموضوع سهل".

وتابع: "الجمهور عنده سوء فهم وفاكرين أن الموضوع سهل إيه يعني يحفظوا كلمتين ويقولهم قدام الكاميرا، أحنا بندمر نفسيتنا؛ لأن المشاعر ممكن تخلي الواحد يموت؛ ممكن نموت من الزعل وأحنا بنعيش نفسنا في الزعل وبنصور 13 أو 14 ساعة في اليوم".

وأضاف: "مشهد ممكن تبقى شرير ومشهد تبقى بتضحك الجهاز العصبي بيدّمر، والناس فاكرة أننا بنهزر؛ أحنا بنلعب على مشاعرنا؛ بنصور 26 ساعة أحيانًا الناس فاكرة أننا بنصور 6 ساعات وبنقعد بعد كده على البسين".

واستطرد: "أنا فاكر صورت في مسلسل كلام على ورق 36 ساعة واقف على رجلي؛ هاتوا مهندس أو دكتور أو محامي أو قاضي يقدر يشتغل 36 ساعة واقف على رجليه مش هيقدر أنا آسف؛ اللي بيستسهل مهنة الفنان هي أصعب مهنة في التاريخ".

وعن دخول ابنتيه ملك وليلى مجال التمثيل قال: "طول عمري مكنتش عاوزهم يخشوا الوسط؛ ولولا إصرار تامر حسني أنهم يمثلوا معاه مكنتش وافقت؛ مش عشان المهنة وحشة؛ لكن عشان صعبة بالذات على الستات".