تعليق قوي من عمرو أديب على فشل دعوات 11/11: البلد عندها عقدة مظاهرات

قال الإعلامي عمرو أديب:"لم يحدث شيء وأنا متكلمتش عن 11/11 خالص ولم أذكر تلك الدعوات لا من قريب أو بعيد، وحضرت كل الـ11/11 في الـ 8 سنين اللى فاتوا بل بالصدفة البحتة كان فيه منهم 11/11/2016 وحضرت كل الجمعات ولذلك الواحد بقى عنده بعض الخبرة في مثل هذه الأمور، ولكن هناك بعض الملاحظات لماذا لم ينزل الناس؟ ومحدش يقولي أصله كان قلقان لإن فيه ناس كتير قابلتني وقلت لهم هتعدي ومش هيحصل حاجة، لإن البلد دي عندها عقدة من المظاهرات والبلد اتعورت واتبهدلت مظاهرات وثورتين في فترة صغيرة جدا وقريب وعندهم ذكريات مؤلمة في هذا الأمر".

 

موقف المصريين من المظاهرات

وتابع خلال برنامج “الحكاية” المذاع علي قناة “ام بي سي مصر”:"الناس مش عايزة بهدلة ولا فوضى عايزين يشموا نفسهم، مفيش وعد علشان الناس تنزل للشارع كل الوعد انزل الحرية في انتظارك ولذلك فهذا أمر عبثي".

 

قنوات الإخوان

ولفت:"المغفلين التلاتة اللي قنوات الإخوان امبارح بالليل طقت في دماغهم اننا غيرنا الخطة وانزل دلوقتي، وانا بقولهم انت غبي يلا انتوا بتتكلموا مع شعب مصري واعي، ويقولوا للناس الخطة التانية اركبوا أوبر واعمل دليفري والناس اصلا اخرها بطاقة تموين، دول ناس اغبياء غباء غير طبيعي والأهم من ده كل انا علشان انزل تنزل انت الأول ياللي دعيت الناش علشان ينزلوا وراك، واللى حصل في 25 يناير ان الشعب لقوا الناس نازلة الشاعر، انما الداعين لـ11/11 قاعدين برة في العسل والغريبة انهم لما ملاقوش حد فضلوا يشتموا في المصريين ويقولوا شعب خنوع وانا بقولهم انه شعب واعي وفاهم وشافكم انكم بتقسموا التركة في الميدان وانكم مركوبين من اجهزة مخابرات، وانتوا قاعدين برة من بيصرف عليكم وعاملي ليكم الأستوديو، وبعد كده تشتمني ده المصريين تديك بالجزمة الفعلية والنهاردة المصريين جابوا جزمة وضربوا التلاتة الإعلاميين بتوع الإخوان علي مؤخراتهم".

 

ولفت:"المظاهرات ترف حقيقي لمن يستطيع ان يفعله، والنهاردة العمال في فرنسا وبريطانيا عندهم اضراب في المترو هل في مصر نقدر نستحمل والله الناس تقرقشوهم بسنانكم وتقولوا فين المترو يا سيسي، احنا مش حمل بهدلة وناس كتير عايشة باليوم، وعندنا ازمة اقتصادية وظروف صعبة هنصعبها تاني".

شبح الإخوان

وأشار:"الناس مكنتش عايزة تنزل وعايزة تحافظ علي البلد، احنا معندناش ولعوه ولا خربوه، احنا عندنا بلد عايزة تاكل عيش، واللي شغالين في قنوات الإخوان برة دول اغبياء، هما فين الإخوان احنا بنتكلم عن شبح".

وتابع:"انا بصراحة كمواطن مصري انا ميهمنيش 11/11 ولكن يهمني 12/11 و13/11 البلد عندها تحديات كبيرة والاستثمار في البلد والتشغيل والبطالة والتضخم، انما 11/11 ميدخلش ذمتي بنكلة، والداعين لمظاهرات 11/11 كلهم الليلة دي في بارات بيسكروا ولا بيهتموا بالمصريين ولا فارق معاهم الناس ولا حياتهم وظروفهم".