ابنة هند رستم تكشف أسرارًا في حياة والدتها وكيفية دخولها التمثيل

تحدثت بسنت رضا، ابنة الفنانة الراحلة هند رستم، عن تفاصيل حياة والدتها الشخصية، وكيفية دخولها المجال الفني، مشيرة إلى أنها مُعجبة بـ هند رستم على المستوى الشخصي بغض النظر عن صلة القرابة.

وقالت ابنة هند رستم، عن حياة والدتها، خلال حوارها مع الإعلامية منى الشاذلي، في برنامج معكم، المذاع عبر شاشة قناة CBC: ماما كانت عايشة الأول مع والدها اللي كانت ظابط شرطة، وكان رافض دخولها الفن نهائيًا، ولكنها مكنتش مبسوطة ولا مرتاحة، كان معاها مرات باباها وإخوات من باباها، هما ولدين وبنت، وجت جدتها والدة والدها خدتها، وبعدين والدتها خدتها.

ابنة هند رستم تكشف كواليس دخول والدتها المجال الفني

كما كشفت ابنة هند رستم، كواليس دخول والدتها المجال الفني، قائلة: كانت رايحة السينما تتفرج على فيلم ومكنش فيه تذاكر، وكان فيه واحدة واقفة جنبها قالتلها تعالي ندفع مع بعض ونتفرج على الفيلم، ودخلوا واتفرجوا وكانت غاوية الأفلام الأمريكية ولكن مش في دماغها التمثيل، وبعدين اللي كانت معاها قالتلها أنا رايحة بكرا مكتب تمثيل، تيجي معايا؟ راحت معاها والراجل في المكتب سألها بتتكلمي عربي؟ قالتله لأ أنا مصرية وبتكلم مصري، لأن كان شكلها خوجاتي أوي، وخدوها هي ومخدوش البنت اللي كانت رايحة أصلًا.

كما تحدثت ابنة هند رستم، عن فساتين ومقتنيات والدتها الراحلة، قائلة: الفساتين دي من سنة 1950، والفستان الذهبي ده اشتريته لما سافرت أول مرة باريس وعملت دور البطولة في فيلم، وكان غالي جدًا ومفيش حد يقدر يعمله دلوقتي لأن كله طبيعي، وده أنا محتفظة بيه وكل ما يكون فيه أي حدث بيطلبوه.

عرض فساتين هند رستم في برنامج معكم منى الشاذلي

وأعربت بسنت رضا، عن حبها الكبير لوالدتها الفنانة هند رستم، قائلة: أنا معجبة بيها وطول ما أنا عايشة لو عملوا لها أي حاجة هروح، أي مؤتمر أو حدث وزي ما حضرتك كلمتيني علشان أجي وأتكلم عنها، وسبحان الله شوفي كام سنة ولغاية دلوقتي بيحبوا هند رستم برا وبيبعتولي ويطلبوا مني مقتنياتها وأروح أتكلم عنها.

وكشفت ابنة هند رستم، عن حب والدتها الكبير للكلاب، موضحة: كانت بتحب الكلاب جدًا وكان عندنا كلبتين وولدوا مع بعض واحدة جابت 12 والتانية جابت 10، ولا يمكن هتوزع كلاب صغيرة، وفضلوا عندنا لغاية ما كبروا والبيت بقى فيه 25 كلب، ولما كبروا وزعناهم.