زيزي عادل في أول ظهور لها بعد اعتزال الغناء: لقيت إن الموضوع كله على بعضه حرام

كشفت الفنانة زيزي عادل، سبب اعتزالها الغناء، مشيرة إلى أنها رأت أن كل ما يحدث في الغناء من كلمات أغاني وحفلات وفيديو كليب وغيرها من الأمور تعد حرامًا.

وقالت زيزي عادل في أول ظهور لها بعد اعتزالها الغناء: الغناء فيه أسس لازم تتعمل علشان أكون مطربة منها إني أعمل فيديو كليب ويكون معايا موديل، وفي كذا حاجة غلط بتحصل، زي كلام الأغنية لأنه سواء فيه حب أو هجر أو عتاب وبيكون فيه تحريك للمشاعر، والفكرة كلها على بعضها حرام.

وأضافت: لما أطلع على الاستيدج لازم ألبس فستان وأتحرك مع المزيكا أكيد مش هقف تمثال، وكان فيه حاجة بتضايقني جدًا في الحفلات مش عندي قدرة ألغيها وأنها أن اللي حاضر بيصورني من زوايا زي ما هو عاوز وبيجيب من الحتة اللي عاوزاها ومش عندي الحق أقول له ما تصورش.

وأردفت زيزي عادل: أنا معرضة أني أتصور على كل موبايلات الناس.. وسألت نفسي ليه أكون متاحة لكل الناس وعلى كل التليفونات.. ليه ماكنش ست قاعدة في بيتي مش متاحة لكل الناس؟ وممكن كل الناس تتفرج على صوري فلقيت أني مش حابة أكون متاحة لكل الناس، وحابة أكون بتاعتي.. وطريقة لبسي اتغيرت وحاولت أكون محتشمة يمكن ناقصني الطرحة وبدعي ألبسها وحلو الواحد.

زيزي عادل تعلن اعتزالها

وكانت زيزي عادل، أعلنت اعتزالها الغناء نهائيًا في شهر أبريل الماضي، لافتة إلى أنها قررت الابتعاد عن الشهرة ومغريات الحياة، إذ خرجت لجمهورها في فيديو نشرته عبر حسابها بموقع إنستجرام، قائلةً: طالعة أقول خبر مهم في حياتي وأهم وأحلى خبر في حياتي وهو اعتزالي الغناء، وأخدت القرار من فترة كبيرة جدًا.