عماد رشاد: أنا زوج رومانسي وبجهز لمراتي العشا على ضوء الشموع

كشف الفنان عماد رشاد سبب رفض ابنته ياسمين، المشاركة في فيلم صعيدي في الجامعة الأمريكية، كما تحدث عن علاقته بزوجته الذي وصفها بالرومانسية.

وقال الفنان عماد رشاد خلال لقائه في برنامج واحد من الناس، مع الإعلامي عمرو الليثي: مكنش ليا دور فى ابتعاد بنتي ياسمين عن الفن، وهي كانت المفروض هتعمل فيلم صعيدى في الجامعة الأمريكية في دور غادة عادل، وخلاص اتفقت مع عائلة العدل على الدور وقبل التصوير بيومين رفضت وقالت مش همثل، وهى بتشتغل دلوقتي فى مجال الديكور.

وتابع رشاد: عندى 3 أحفاد وأنا أقرب واحد ليهم فى العيلة، ومرتبط بيهم جدًا، وبحاول أقلل من ارتباطى بيهم علشان لما ييجي موعد رحيلى ما يبقاش صعب عليهم، وكتير من الناس نصحونى بكده لأن أسرارهم معايا، وأنا اللي بجيب ليهم ملابسهم وكل حاجة، وأنا خايف عليهم من صدمتهم بعد رحيلى.

وأردف الفنان عماد رشاد متحدثًا عن علاقته بزوجته، قائلًا: أنا زوج رومانسي وعاطفي جدًا، وبجهز العشا لمراتي على ضوء الشموع، ومستحيل هعمل كده وهي هتبقى وحشة معايا، وأهم حاجة ريّح مراتك وقول لها حاضر، واعمل اللي أنت عاوزه.

عماد رشاد يتحدث عن ترك زوجته للتمثيل

واختتم رشاد حديثه قائلًا: نصيحتي للشباب لما تعمل غلطة أوعى تعترف، لأن الست الشرقية هتفضل فاكراها ليك، وأنا مش هعترف ولا عمري هعترف، وبقالى 40 أو 45 سنة متزوج، لأني اتجوزت وأنا صغير ومراتي سابت التمثيل بعد سنتين من الجوازبعد ما خلفنا ياسمين، كان قرار خاطئ وكنت أتمنى إنها كانت ترجع تشتغل علشان كانت مركزة معايا أنا بس.