تعليق ناري من شوبير على خسارة الزمالك: مين كان المدرب فيريرا ولا نبيه؟

علق الإعلامي أحمد شوبير، على خسارة الفريق الأول لنادي الزمالك أمس، أمام فاركو بثلاثة أهداف دون رد، خلال المباراة التي أقيمت بينهما في بطولة الدوري المصري الممتاز.

قال شوبير، خلال تصريحات إذاعية: قبل الحديث عن الخسارة أمام فاركو، شوفوا من بداية هذا العام 2023 الزمالك خاض 7 مباريات، فاز فقط على فريق فيوتشر، وخرج من بطولة كأس مصر على بيراميدز.

وأضاف: في أول 8 مباريات بالدوري، الزمالك حقق الفوز في 6 ولم يستقبل شباكه أهداف، وكان بيقدم مستوى مميز، ولكن ايه اللي حصل محدش فاهم، ايه اللي غير الأمور بهذ الشكل، محدش عارف حاجه خالص.

وأكمل: عاوز أسأل سؤال مين كان مدرب الزمالك أمام فاركو، مستر فيريرا ولا أسامة نبيه، إجابة صعبة جدا، كنا شايفين البرتغالي قاعد على الدكة طوال المباراة، وأسامة نبيه هو اللي على الخط، والحقيقة احنا مش عارفين فيريرا قاعد مدير فني، ولا ايه وهو اللي حط التشكيل ولا أسامة نبيه.

ليه بتفكروا أني ضد الزمالك نعم أنا أهلاوي جدا

وتابع شوبير: ليه بتفكروا أني ضد الزمالك نعم أنا أهلاوي جدا.. بس بعشق نجوم الزمالك ليه بتفهموني غلط وبتهجموني، الكرة مكسب وخسارة، وياما الأهلي خسر بطولات ومباريات، ونفس الأمر للزمالك، ولكن يبقى الاحترام في النهاية.

وشدد في نهاية حديثه: هناك أمور غير مفهومة تسير داخل الفريق، هجوم على نجوم الفريق، ثم تغيير المدرب وعودة المدرب وقرارات عكس بعضها، وتهديد بالانسحاب، يا جماعة لاعب الكرة يحتاج للهدوء ويكفي الموسم الماضي اللي الزمالك مجبش فيه ولا صفقة وكان موقوف قيده ونجح في تحقيق بطولة الدوري بالهدوء.