في أول ظهور له بعد مرضه.. مدكور: «أنا في اختبار»

في أول ظهور تليفزيوني له بعد إعلانه إصابته بسرطان القولون طل الإعلامي شريف مدكور، على جمهوره عصر اليوم السبت، عبر قناة "الحياة" 

وقال مدكور من خلال برنامجه "4 شارع شريف"، "من بعد ما أعلنت الخبر وحطيت صورتي على فيسبوك جالي أكتر من 100 ألف رسالة، تليفوني من يومها مش بيبطل رن، أنا بشكر كل الناس اللي سألت عليّا، أنا اكتشفت إني عندي ورم خبيث في القولون، وإن شاء الله هشيله في أول أسبوع من رمضان".

وتابع: "أنا طول عمري لما كان بيجيلي في البرنامج حد بيحارب السرطان، كنت دايمًا بقويه وأشجعه وأقوله خلي المرض يقويك ومايكسركش، فأنا دلوقتي اتحطيت في الاختبار ده".

وأضاف: "أنا كنت دايمًا بقول إن السرطان زي الإنفلونزا، ربنا اللي حطيني في الاختبار ده وبقدرته هيخليني قوي جدًا، وعشان كده أنا نازل بشتغل عادي، وهعمل حلقات رمضان، لأن بالنسبالي العمل عبادة، ولأني لو قعدت في البيت هكتئب".

وتابع: "انا متهزتش لما عرفت الخبر، أنا قوي وهفضل أتعامل عادي جدًا، وفرحان وسعيد بالمرض اللي فيّا، وبإيماني بربنا وقوتي والناس اللي حواليا عارف اني هعرف اقضي على السرطان في أقرب وقت إن شاء الله".