عميل يشتكي من خدمة عملاء فودافون: بيزعقلي وبيقولي أنت معندكش مشكله أصلا

تقدم محمد عادل، عميل في فودافون، بشكوى ضد خدمة عملاء شركة الاتصالات الشهيرة، قائلًا: "خصموا فلوس واشتركوا ليا في خدمة بمزاجهم".

وقال العميل عبر أحد الجروبات الخاصة بالشكوى: "شركه فودافون و مثال يحتذى بيه في خدمه العملاء! مع تدني خدمات فودافون اضطريت اجيب خط تاني من شركه منافسه يبقي هو خطي الأساسي و احتفظت بالخط ال فودافون لانه معايا من زمان جدا و مينفعش استغني عنه وبقيت اعمل باقه بسيطه ي 30 جنيه كل شهر علشان يفضل active".

وأضاف: "جالي عرض علي فودافون كاش اني لو جددت الباقه من خلالهم هاخد خصم 20% ، و بالفعل عملت كده. تاني يوم الصبح لقيت معايا رصيد 11 جنيه! ففتحت تطبيق انا فودافون افهم جم منين، لقيت انهم حولوا 24 جنيه لتجديد الباقه بدل 30 علشان الخصم اللي عندي. و بعدين حولوا 24 جنيه تانيين من دماغهم، و اشتركولي في خدمات كمان و باقي 11 جنيه. قولت هتواصل مع خدمه العملا والموضوع بسيط يعني، لكن ممثل خدمه العملاء مكنش عنده اي معلومه يعني إيه خدمه عملاء طول الوقت بيقاطعني وانا بتكلم و بيزعقلي و يقولي انت معندكش مشكله اصلا!".

وتابع: طوانا بحاول افهمه براحه بقول يمكن لسه جديد لحد ما جبت أخرى من طريقته و قولتله يديني اي supervisor يقولي بالحرف : لا اصل انت معندكش مشكله و بصوا المفاجاه فضلنا نقرر الجمله دي حوالي دقيقتين ونص انا : انا اللي احدد عندي مشكله ولا لا هو : لا مش متاح احولك لمديري انت معندكش مشكله دقيقتين و نص بنقول نفس الجمله لحد ما قفل السكه في وشي! ".

وأتم: "بعدها حاولت 10 مرات اتصل بخدمه العملاء المكامله اول ما بختار اللغه العربيه تفصل لوحدها، معرفش هو عمل حاجه من عنده ولا دي صدفه علشان مظلموش، لكن ده عمره ما حصل معايا قبل كده و مش هيبقي 10 مرات. المبلغ تافه جدا، لكن فعلا فودافون بعد ما كانت هي الرائده في مجالها بقت من أسوء الشركات لعدم اهتمامهم بمستوى ممثلي خدمه العملا. لازم الشركات كلها تفهم ان قطاع خدمه العملاء ده هو صورتك قدام العملا بتوعك و أهم قطاع عندك في الشركه".