تفاصيل جريمة علي اذن الفجر.. كنا سهرانين بنتكلم ونهزر لغاية ما حصل ما بينا مشكلة وخنقتها وماتت

«اتجوزنا سنة 2015 عن طريق حد من قرايبنا، وخلال فترة جوازنا كان في مشاكل بسبب أنها مبتسمعش كلام أمي وطلقتها، وفي 2019 رجعنا تاني، لكن بردو كان في مشاكل وكانت بتغضب دايما، ورجعت البيت قبل الواقعة بيومين يوم 13 مارس 2020 كنا سهرانين لغاية الساعة 2 الفجر بنتكلم ونهزر لغاية ما حصل ما بينا مشكلة وخنقتها وماتت»، بهذه الكلمات بدأ «سعيد. ع. ع، 30 عاما، حلاق» سرد تفاصيل واقعة قتل زوجته.

البداية كانت عندما تلقى قسم شرطة الجيزة بلاغا من هيئة الإسعاف يفيد بوجود جثة المجني عليها «رشا. ص» في منزل الزوجية الكائن بشارع عباية المتفرع من شارع جسر الكونيسة بالمنيب الجيزة، ووجود شبهة جنائية، وعلى الفور انتقلت قوة من القسم لمكان الواقعة وتبين صحتها، وبمناقشة الزوج أقر بارتكابه للواقعة لوجود خلافات زوجية بينه وبين زوجته المجني عليها.

وأدلى المتهم في تحقيقات النيابة بأقواله، أنه «اللي حصل لنا رجعت من الشغل امبارح حوالي الساعة 8 مساء قعدت شوية مع أولادي وبعد كده طلعت أنا ومراتي وأخويا ومرات أخويا فوق البيت لأني في اليوم بتاع الواقعة اللي هو 13 مارس كان في مطر مغرق الدنيا وطلعنا فوق السطح علشان نشيل المياه دي وبعد ما خلصنا كل واحد نزل على شقته بعدين قعدنا شوية أنا والأولاد ومراتي وهم دخلوا يناموا وأنا ومراتي دخلنا قعدنا في الأوضة بتاعتنا شوية وإحنا بنتكلم شدينا مع بعض في الكلام شوية، علشان هي كانت عاوزة تجيب أوضة نوم جديدة، وأنا قلت لها لما المبلغ اللي معايا يوصل 13,000 جنيه هنجيب الأوضة، وضربتها بالقلم، فعضتني من إيدي قومت خانقها من رقبتها وضربتها لقيتها وقعت ومتحركتش».

 

 

وأضاف، «نزلت استنجد بأبويا وأخويا علشان يلحقوها لكن كانت هيا خلاص ماتت، طلبت الإسعاف علشان اتأكد هيا لسه عايشة ولا لأ الكلام ده كان الفجر لما جم وبعدين بلغونا أنها ماتت، وسابونا ومشيوا ولقيت الشرطة جاية بتقبض عليا علشان في شبهة جنائية في الوفاة».

وتولت النيابة العامة التحقيق في الواقعة والتي أمرت بإحالة المتهم إلى محكمة جنايات جنوب القاهرة المنعقدة بزينهم، وأصدرت حكمها ضد المتهم بالسجن المشدد لمدة 10 سنوات.

 

صدر الحكم برئاسة المستشار مدني دياب مهران وعضوية المستشارين وائل فاروق إسماعيل وسمير صلاح الدين محمد وإيهاب كمال عزيز الراهب وأمانة سر هاني أحمد حمودة وأيمن عبداللطيف.